.......అక్షరాల ఓదార్పు....
గుండె గుహలో భావాలు ఎన్నో
వేదనలే అవుతున్నాయి వెలికి వచ్చేవన్నీ

రెప్పల మాటున మాసిన ఆశల ఊహల చిత్రాలెన్నో
నెరవేరని నిన్నటి కలలు
ఉక్కిరి బిక్కిరి చేస్తూ రేపటి ఆశల మధ్య
నలుగుతున్న రాత్రులెన్నో
సమస్యల సముద్రాలు దాటే ప్రయత్నంలో
వదిగిన క్షణాలెన్నో
ఒలికిన కన్నీటి సిరా
తెల్లని కాగితంపై
నల్లని అక్షరాలౌతాయి
జతకూడిన ఒక్కో అక్షరం
కొత్త భావాన్ని సంతరించుకుంటుంది
మనసు ప్రక్షాళన అవూతూ
కాగితంపై కవితగా మారుతుంది
వేదనలో ఒదిగిన గుండె
కాసిన్ని గాలుల్ని బయటకు వదిలెస్తుంది
మామూలు ప్రపంచాన్ని చూస్తుంది
జ్ఞాపకాల దొoతరలు
అక్షరాలై కురుస్తుంటాయి
ఒక్కో పదం ఒక్కో ఓదార్పై
భావాల అంతరంగంలో విహరిస్తుంది
ఆశలేని మనసుకు
అక్షరాలే కోరికలు నేర్పుతుంటాయి
....వాణి కొరటమద్ది